ROXAS CITY – Magkatuhay nga mga reaksyon ang ginpabutyag sang pila ka mga ginikanan matapos nga gin-aprubahan ni Presidente Rodrigo Roa Duterte ang rekomendasyon sang Department of Education (DepEd) nga tuyo magpatigayon sang dry run sang face to face classes/learning sa mga lugar nga low risk ukon manubo nga kaso sang transmission sang COVID-19 sa Enero 2021.
Suno kay Nanay Merlyn Liguan 61-anyos sang Arches Subd., San Roque St., Roxas City nga indi ini pabor sa tion nga ipatuman ini sa probinsya.
Ini bangud nakahangan ini sa posibilidad nga malatnan ang iya mga apo sang kagaw nga dala sang COVID-19.
Ginpahayag sini nga apisar mabudlay sa ila parte apang importante sa gihapon ang ikaayong lawas sang kadam-an.//
Wala man nalikawan ni Liguan nga mangin emosyunal bangud sa kabudlay subong sang sitwasyon sa pagpangabuhi dala sang pandemya ilabi na nga sakto lamang ang ginakita sini pinaagi sa ila nga pagpamaligya.
Samtang, suno naman kay Charisse Nepucpan 27-anyos sang New Road, Banica sining siyudad wala man sang problema ang nasambit nga rekomendasyon apang ipatuman sa gihapon ang mga minimum health protocols.
Dugang pa sini nga apisar mabudlay ang sitwasyon subong pag-abot sa pagtulun-an bangud sa distance learning indi man lipod sa ihibalo sang kadam-an nga mangin sila ang nabudlayan naman.
Ini bangud ginpahayag sini nga lain ang pagtulun-an kun naga-face to face ang mga manunudlo kag mga estudyante.
Sa karon ginatugyan na lamang nila sa natungdan nga mga ahensya sang gobyerno ang desisyon kun ano ang makapamaayo sa publiko.
Mahibaluan nga gintalana sang DepEd ang Enero 11 tubtob 23 sa madasun nga tuig ang nasambit nga dry run.
