ROXAS CITY – Nabudlayan subong ang pila ka mga ginikanan sa ginhatag nga modules sang mga manunudlo sa ila mga kabataan.
Sa interview sang Bombo Radyo sa isa ka ginikanan nga mabudlay sa ila ang sitwasyon sang pagtudlo sa ila mga kabataan bangud sila man mismo ang wala nakahibalo kun ano ang nasaad sa nasambitan nga mga modules.
Ginpahayag sini nga indi mahapos para sa ila nga mga ginikanan ang kasubong sini nga set-up bangud bisan sila mismo indi kasabat sang mga pamangkot sa modules.
Apang, wala sila mahimo sa baylo nga magsunod na lamang kun ano ang mga nagakaigo nga pagsulundan para indi maapektuhan ang pagtuon sang ila mga kabataan.
Dugang pa sini nga may yara sang mga kabataan nga indi kasaho magsabat sa ila nga modules bangud wala ini gina-eksplikar sa ila sang maayo ang ila lesson.
Mahibaluan nga sa una pa lamang nga pagbukas sang klase madamo na sang reklamo ang Department of Education natuhoy sa nagkalain-lain nga learning modalities ilabi na sa printed modules, program lessons sa broadcast media kag ang duration sang study sessions.
Bangud sa COVID-19 pandemic, 60% sang curriculum ang gindula bilang adjustment sa blended learning para subong nga school year kag ang klase ginapaagi na lang sa self-learning modules, broadcast media kag sa internet.
