Nakabaton sang kritisismo ang mag-asawa sa Japan matapos ginsuportahan ang desisyon sang ila 13-anyos nga bata nga si “Tarou” nga mag-untat sa pag-eskwela agud mag-focus sa mangin professional e-sports player.
Suno sa report, maayo maghampang sang video game nga Fortnite ang bata kag ginakabig nga “prodigy” ukon expert sa amo nga hampang apisar bata pa ini.
Nagsugod siya sa paghampang sang tatlo pa lang siya ka tuig kag sang walo ka tuig na siya nagadaug na siya sa mga propesyonal nga humalampang sang Fortnite.
May ara man ini sang masobra 230,000 ka mga subscriber sa YouTube.
Ang iya amay nagsiling nga ang pagkadto sa eskwelahan nagaubos lamang sang enerhiya sang bata nga dapat niya gamiton sa paghanas.
Ginbida man niya ang “exceptional concentration” sang iya anak, sa diin naghampang siya sang una sa sulod sang 28 ka oras nga wala nagauntat ukon nagakaon.
Apang, ang opinyon sang publiko nabahinbahin; Samtang may mga nagapati nga ang mga kabataan may daku nga potensyal sa kalibutan sang e-sports, madamo ang nagpabutyag sang kabalaka nga mahimo sila madulaan sang normal nga mga inagihan sang pagkabata, lakip ang pormal nga edukasyon, pagpakig-upod sa iban nga kabataan, kag iban pa nga importante nga mga ikasarang sa kabuhi.
Sa karon, ang isyu padayon nga ginahambalan sa social media, nga ang iban nagapadaku sang importansya sang balanse sa tunga sang talento, edukasyon, kag kaayuhan sang mga kabataan.
