ROXAS CITY – Tuman ang kalipay nga nabatyagan sang mga ginikanan sang Capizeña Athlete nga nakakuha sang bulawan nga medalya sa 100-M Hurdles Secondary Girls sa nagapadayon nga hinampang sa Palarong Pambansa 2023 sa Marikina Sports Center.
Nangibabaw sa nasambit nga kumpetisyon si Angel Villagracia, Grade 9 Student sa Capiz National High School kag residente sang Barangay Solo, Pontevedra, Capiz.
Sa interview sang Bombo Radyo kay Mrs. Josephine Villagracia, iloy ni Angel, daw kaangay napanas ang ila kakapoy sa pagpanarabaho sang nabalitaan ang kadalag-an nga naangkon sang iya subang nga bata.
Suno kay Nanay Josephine, elementarya pa lang nakitaan na sang huyog sa Track and Field si Angel kag talalupangdon ang pagpangibabaw sini sa nagkalain-lain nga kategorya kabangdaan agud makakuha sang scholarship sa nasambit nga buluthoan.
Mahibaluan, magluwas sa subong nga kadalag-an, naghatag man sang bugal sa Capiz si Angel matapos nakakuha man sang 1 ka gold, 1 ka silver kag 1 bronze medal sa nagkalain-lain nga kategorya sang track and field sa Batang Pinoy 2022 nga ginhiwat sa Vigan, Ilocos Sur.
Nagapasalamat man si Josephine sa mga naga-suporta kay Angel, mapa-prayers man ukon pinansyal.
