ROXAS CITY, CAPIZ – Tuman ang kalipay nga nabatyagan sang ginikanan ni Andrea Deondo sa naangkon nga kadalag-an sang ila anak sa Palarong Pambansa 2025.
Si Andrea ang nagmadinalag-on sa Table Tennis (secondary girls doubles) kaupod si Leslie Faye Dizon, lunsay mga estudyante sang Vicente Andaya Sr. National High School (VASNHS), Sigma, Capiz.
Sa interview sang Bombo Radyo kay Rona Deondo, iloy ni Andrea, iya ginpahayag nga proud gid sila sa nalab-ot sang ila anak.
Suno sa iloy, Grade 4 pa lang si Andrea nakitaan na ini sang potential sang iya manunudlo kag luyag man sang ila anak ang pahampang sang Table Tennis.
Pahayag niya, dedikado ang ila anak kag wala nagauntat sang training rason nga madamo na ini sang napasakupan nga tournament kag nagadaog.
Mensahe sang iloy sa iya anak, masami mangin humble kag indi gid magbag-o, balikdon kun ano ang ginhalinan kag kun sin-o ang mga nagbulig sa iya agud mangin madinalag-on sa patag sang sports.
– Interviewed by Bombo Jessa Mae De Los Santos and Bombo Francis Biñas
