ROXAS CITY – Ginpanginwala sang Barangay Kagawad nga ginhampak niya sa likod ang bana ni Punong Barangay Elizabeth Santiago sang Barangay Dinginan, Roxas City sang Setyembre 14, takna 9:30 sang aga.
Sa interview sang Bombo Radyo kay Brgy. Kagawad Romeo Agusan sang nasambit nga Barangay, ginsiling sini nga wala sang kamatuoran ang alegasyon ni Mr. Aurelio Santiago, asawa ni Kapitana.
Matandaan ginpakigbahin kahapon nga adlaw sa Bombo Radyo ni Aurelio nga ginabatyag niya pa ang sakit sang iya likod tuga sang ginaalegar paghampak sang mabaskog sa iya ni Kagawad Agusan.
Apang suno kay kagawad, ginkablit niya lamang si Aurelio sa abaga kadungan sang iya pagsita sini nga indi mag-intra sa ginahusay sang lupon ng Barangay sa sulod sang ila Barangay Hall.
Ginpanginwala niya man nga nagpalagyo siya matapos sang insidente kundi sa matuod, nagluntad ang komprontasyon sa tunga nila nga duwa kun sa diin ginpamangkot siya ni Aurelio kun ngaman ginapasilabtan siya, kag ginsabat niya man ini nga nagakadapat lang siya nga sawayon bangud obligasyon niya ini bilang opisyal sang Barangay.
Yara man si kagawad sa Barangay Hall adlaw-adlaw kag sa tion sang insidente kabaliskaran suno diri sa ginsiling ni Aurelio nga hinali nalang siya nag-abot kag ginhampak ini sa likod.
Mag-abyan man sila kag ihado niya ang bata ni Aurelio gani wala suno diri sang rason nga hampakon niya ini sa likod, sa matuod suno diri pananglitan kastiguhon niya si Aurelio wala siya makahibalo sang posible sini nga madangatan.
Ginsiling ni Agusan nga posible nahuy-an lang si Aurelio sa iya pagsaway bangud makaduwa naman ini ka beses natabo.
Mahibaluan ginpa-blotter na siya ni Aurelio kag ginahulat niya nalang nga may magpatawag sa iya, apang suno kay kagawad handa siya mag-atubang bisan diin malab-ot, mas maayo pa suno diri nga may media kag pulis agud mahibaluan ang kamatuoran.
Ginpahayag ni Kagawad Agusan nga mahimo man magtestigo ang tatlo ka lupon nga nakakita sang insidente.
Luyag sini ipalab-ot kay Aurelio nga indi maayo ang ginbuhat sini sa iya, ang pagsaway niya ang para man sa kaayuhan ni Kapitana Santiago.
Panugyan sini kay Aurelio nga indi mag-intra sa obligasyon sang mga opisyal sang Barangay.
