ROXAS CITY – Plano palang ang tanan nga hatagan sang P300 ang 13 ka mga indibidwal nga wala nalakip sa listahan sang pagahatagan sang ayuda.
Ini ang ginpahayag ni Brgy. Kagawad Milagros Senita sang nasambit nga lugar sang ma-interview sang Bombo Radyo Roxas.
Suno diri bilang isa ka presidente sang isa ka asosasyon ukon committee sang farmers, sang nag-abot ang listahan sang Department of Agrarian (DA) nakita na sini ang pagahatagan sang ayuda kag 13 ka mga mangunguma ang wala nadala diri.
Matandaan nga sadtong Pebrero 12, alas 8:00 sang aga nagpatawag si Senita sang meeting sa ila nga barangay kag kapin 112 ang nagtambong kag 25 diri ka mga indibidwal ang wala nakatambong.
Suno diri nga ginhinyo sini niya sa iya mga kaupod nga mga mangunguma nga kun tani hatagan sang P300.00 ang mga wala nadala sa ila nga listahan kag nagpasugot man ang iban sa ila kag wala man niya suno diri ginapilit ang mga indi luyag maghatag.
Ginsiling man sini nga indi siya mabasol bangud ang lista ang naghalin sa Region kag nagbaton lamang ini kag wala ini nagpanghaw-haw sang mga tawo nga indi mahatagan sang ayuda.
Dugang pa diri nga wala na ini nagpadulong sa talatapan sang DA agud ipahibalo ang iya plano nga paghinyo sang nasambit nga kantidad sa mga mangunguma bangud suno diri nga indi man sang malain ang iya nga tinutuyo. Samtang suno kay Senita nga nahibaluan man niya nga wala sa guidelines ang iya nga ginabuhat apang ginapaminsar gid lamang sini niya ang balatyagon sang iya kasubong man nga mangunguma.
