TAGBILARAN CITY – Ginapabakod sang lokal nga panguluhan sang Bohol ang ila mga tikang para mapagaan ang epekto sang posible nga El Niño, labi na sa sektor sang agrikultura, suplay sang pagkaon, kag mga komunidad nga pinakaapektado.
Suno kay Assistant Provincial Agriculturist Larry Pamugas, ginpabakod sang Office of the Provincial Agriculturist (OPA), ang ila pag-andam agud malikawan ang daku nga kalugi sa produksyon nga dala sang mabaskog nga tagtuyot.
Ginsiguro man niya nga may igo nga rice buffer stock ang probinsya nga madugay tubtub mga 160 ka adlaw.
Ginpangabay man ang mga mangunguma kag mga panimalay nga mag-diversify sang pagkaon paagi sa paggamit sang mga root crops pareho sang cassava kag camote.
Ginhangkat liwat ang mga mangunguma kag kabalayran nga mag-diversify sang pagkaon pinaagi sa paggamit sang mga root crops pareho sang kamoteng kahoy kag kamote.
Ginapahinumdum man ang “ABAKADA guide for riceponsible consumption,” nga nagapasanyog sang paghalo sang bugas sa iban pa nga pagkaon pareho sang mais, adlay, kag saba, pagkaon sang brown rice, paglikaw sa pag-usik, kag pagsuporta sa lokal nga bugas.
Bilang pagpanghanda sa kakulang sang ulan, ginapasanyog man ang pagtamnan sang mga short-term kag drought-resilient nga tanom pareho sang pechay agud masiguro ang padayon nga suplay sang pagkaon.
Ginapahanumdom ang mga mangunguma nga magparehistro sa Registry System for Basic Sectors in Agriculture agud makabaton sang bulig halin sa gobyerno, lakip na ang crop insurance.
Nakig-koordinar man ang probinsya sa mga ahensya pareho sang Department of Agriculture, Department of Agrarian Reform, kag Bureau of Soils and Water Management para sa suplay sang liso kag teknikal nga suporta. Lakip man sa mga tikang ang cloud seeding agud mapabilin ang lebel sang tubig, labi na sa mga dam pareho sang Malinao.
Nahibaluan nga sang Mayo 2024, labaw sa P420 milyon ang kadaut sa agrikultura sa Bohol tungod sang El Niño, nga nakaapekto sa sobra 100,000 ka mga mangunguma.
