ROXAS CITY – Tuman ang pagkabalaka ni Wenie Lyn Gallano, iloy sang 14-anyos nga nadula sang pila na ka adlaw, matapos nga wala ini ihibalo kun diin na sa karon ang iya bata nga babayi kaupod ang iya nobyo nga 17-anyos.
Sa pagpakig-angut sang Bombo Radyo kay Gallano, nga residente sang Brgy. Dinginan, sini nga syudad, Nobyembre 11, Biyernes sang aga, sang nagpanguha ini sang hibyok sa ibabaw bukid kaupod ang tatlo sini ka mga magagmay nga kabataan.
Nabilin sa ila balay ang iya subang nga bata nga si Maria Lyn Gallano Belo, 14-anyos.
Apang, sa pagpauli sang Iloy, wala na sa ila balay si Maria Lyn kag dala sini ang bag kag pila ka panapton.
Ginpadulongan man sang Iloy ang balay sang nobyo sang iya bata sa Brgy. Banica, pagkaadlaw sang Lunes, apang natukiban man nga nadula man si John Nico Bigcas Prado, 17-anyos kaupod ang manghod sini nga lalaki nga menor de edad man.
Ginpakigbahin sang Iloy nga ginhimo na ini sang iya bata nga maglakat sa ila balay sadtong Agosto sini nga tuig kag didto nagpadulong sa balay sang iya nobyo.
Aminado ang Iloy nga pagkatapos sadto nga hitabo, gin-akigan niya ang iya bata, apang sa karon, wala niya na ini gina-akigan bangud basi magsunggod ang iya bata sa iya.
Nahibaluan nga may lima pa ka utod si Maria Lyn kag Grade-8 student ini subong.
Sa nakakilala ukon makakita sa mga nasambit nga menor de edad magpakig-angut lang sa numero 09633912947 ukon diri sa Bombo Radyo ukon sa Roxas City PNP.
