Gin-file ni Senator Imee Marcos ang Senate Bill No. 2067 nga nagatuyo nga i-postpone ang Barangay kag Sangguniang Kabataan Elections (BSKE) halin Nobyembre 2026 tubtob Oktubre 2027.
Suno sa senador, may kahangawa nga indi tanan nga Pilipino makaboto tungod sa mataas nga pletehan nga resulta sang mahal nga krudo.
Tinutuyo sang nasambit nga hagna nga kun ma-postpone ang eleksyon, magapadayon ang serbisyo sang mga opisyales sang barangay, nga daku nga bulig sa pagtutok sa kinahanglanon sang komunidad sa tunga sang krisis.
Ginpahayag man nga magalab-ot sa P16 bilyon ang magasto para sa BSKE suno sa Commission on Elections (COMELEC), indi pa kaupod ang dugang nga gasto sang PNP, DepEd, kag lokal nga gobyerno.
Suno kay Marcos, mas maayo kun gamiton anay ang pondo para sa mga nagapanguna nga kinahanglanon sang pumuluyo pareho sang pagkaon, krudo, kag iban pa nga serbisyo.
Dugang man sini nga malapit nalang sa Undas ang eleksyon, nga ginapaabot ang pagdagsa sang mga biyahero kag pagtaas sang pletehan.
Para sa senadora, importante ang Undas bilang panahon sang pagdumdom sa mga napatay nga pamilya, gani dapat anay tugutan ang mga Pilipino nga magpangamuyo kag maghandum nga wala sang sablag sang eleksyon kag pamulitika.
