ROXAS CITY -Bukas ang presidente sang Roxas City Tricycle Operators and Drivers Association (RCTODA) nga magbulig sa mga TODAs nga luyag magpalab-ut sang sentyemento sa syudad apang wala ginakilala sang city government.
Ini ang ginpabutyag ni Mr. Wilson Devela, Presidente sang Roxas City Tricycle Operators and Drivers Association (RCTODA) sang mainterview sang Bombo Radyo.
Kasunod ini sang ginpadala nga petisyon sang Capiz Tricycle Operators, Drivers and Commuters Alliance (CTODCA) sa sangguniang panlalawigan angut sa pagbiyahe sang mga tricycle sa syudad.
Ginpahayag ni Devela nga may yara sang basEhan ang ginpalab-ut nga petisyon sang CTODCA apang madugay na ini nga ginpalab-ut sang RCTODA sa lokal nga gobyerno sang syudad.
Suno kay Devela nga madugay na nga ginhinalaan sang RCTODA kag iban pa nga grupo sang mga tricycle nga ginakilala sang syudad ang mga ginpalab-ut sang CTODCA rason nga nahatagan na ini sang aksyon sang lokal nga gobyerno sang syudad.
Gindugang pa ni Devela nga posible wala sang ihibalo ang CTODCA sa mga plano sang sektor sang mga tricycle kag sang lokal nga gobyerno sang syudad bangud wala ini sila gina-imbitahan.
Samtang ginpasalamatan man ni Devela ang sangguniang panlalawigan kag sangguniang panlunsod nga ginhatagan sang pagtamod ang petisyon sang CTODCA sa pihak nga indi ini accredited nga grupo sang mga tricycle sang syudad.
