PANAY, CAPIZ – Nagdangop sa Bombo Radyo ang isa ka ginang agud ireklamo ang ginaalegar pagpanghatag sang mga opisyales sang ila barangay sang expired nga mga produkto sa ginpatigayon nga Christmas party sa Barangay Anhawon, Panay, Capiz.
Suno sa wala na ginhingadlan nga ginang nga nagpatigayon sang nasambit nga aktibidad sadtong Disyembre 20 ang ila mga opisyales kun sa diin imbitado ang mga senior citizen.
Diri suno sa iya nagpanghatag sang mga grocery products nga ginalakipan sang mga sangkap sa spaghetti, canned goods kag juice drinks.
Ginpahayag sang ginang nga naglain ang pamatyag sang iya nga anak sang gin-inom sini ang juice drink.
Sang iya gintsekyar ang ginpanghatag nga mga produkto, iya natukiban nga lunsay nag-expired na ang mga ini sadtong Disyembre 3 kag Nobyembre 3, sini nga tuig.
Ginpahayag sang ginang nga sang iya ginpalab-ot ang reklamo sa mga opisyales sang barangay, nadismaya lamang siya bangud ginhambalan lamang ini nga mahimo pa nga kaunon kag imnon ang nasambit nga mga produkto bangud may extension pa ini antes ang iya nga expiry date.
