ROXAS CITY – Ginahulat na lamang ni Punong Barangay Tito Dipon Barnuevo sang Barangay Linao sa banwa sang Panay ang ginpapanaog nga “order of suspension” sang office of the Ombudsman kasunod sang mga alegasyon nga imbolbado ini sa anomalya sa distribusyon sang Social Amelioration Program (SAP) sa ila lugar.
Ini matapos nga kalakip ini sa pito ka mga opisyales sang barangay sa Western Visayas nga magapangatubang sang anom ka bulan nga preventive suspension.
Suno kay Barnuevo nga ginkakibot sini ang ginpapanaug nga “order of suspension” sang Office of the Ombudsman kun sa diin ginpanginwala sini nga may yara sang kaltasanay sang nasambit nga ayuda.
Matandaan nga nagkasugot ang mga benepisaryo nga buhinan sang P950 ang nabaton nga ayuda agud ihatag sa iban nga wala makabaton sang nasambit nga bulig pinansyal.
Ginpanindugan man sini nga wala ini sang mando nga buhinan ang nabaton nga ayuda apang gin-ako sini nga yara siya sang tion nga nagkasugot ang mga benepisyaryo.
