ROXAS CITY – Nangin matalunsay kag generally peaceful ang ginhiwat nga fluvial parade kadungan sa pagselebrar sang kapistahan sang San Juan Bautista sa Barangay Baybay sining syudad.
Ini ang nangin pahayag ni Coast Guard Senior Chief Petty Officer Arnel Nisola, Deputy Commander for Operations sang PCG-Capiz sang ma-interview sang Bombo Radyo.
Suno kay Nisola, hugot nga ginbantayan sang PCG Capiz ang tanan nga mga nagpakigbahin nga baroto sa amu nga aktibidad ilabi na pag-abot sa pagpasunod agud malikawan ang pagpa-una-una sa diin mahimo nga magresulta sa pagkawasak sang prosesyon.
Nangin mahupos man suno diri ang ila pagbantay kag pagsuway bangud gilayon man nga nagapati ang mga tawo.
Mahibaluan nga 119 nga mga baroto ang nagpakigbahin sa amu nga aktibidad, apang ang nasambit nga numero ang ba-se lamang sa mga nagpalista kag wala pa diri nalakip ang iban pa.
Dako man ang pagpasalamat ni Nisola sa tanan nga mga nagbulig sa ila sa pagpatigayon kag mapabilin nga mangin matalunsay ang amu nga selebrasyon, ilabi na sa mga Barangay Officials kag iban pa nga mga rescue teams.
Samtang, may yara lang suno diri nga mga pila ka mga indibidwal ang nagsuway sa ila ginapatuman nga pagsulundan apang gilayon man ini nila nga ginsuway kag ginpahibalo.
Magluwas sini, wala na sang may nabalhag ang PCG Capiz sang iban pa nga mga insidente kadungan sa pagselebrar sang San Juan Bautista.
