ROXAS CITY- Gintalakay sang Sangguniang Panlalawigan sang Capiz ang nagkalain-lain nga legislative measures, ordinansa, pondo kag lokal nga polisiya sa Regular Session No. 60 sang 12th Sangguniang Panlalawigan sin inga Agosto 25, 2026 sa Capiz Provincial Capitol. Lakip sa first reading ang resolusyon nga gin author ni Board Member Aldwin A. Cruz-am nga nagapahayag sang pagpasalamat kag pag apresyar sang Sangguniang Panlalawigan kag Capiz Provicnial Government sa mga opisyal sang Aklan bangud sa mainit nga panahon kag pag accommodate sa Capiz delegation sa benchmarking activity.
Gintalakay man ang Ordinance No. 065-2026 sang Roxas City nga nagahatag otorisasyon sa alkalde nga magdugang sang P115, 019.20 sa appropriation para sa other personnel benefits ukon monetization sang leave credits sa City Treasurer’s Office. Sa committee reports naman, ginsuportahan ang validity sang Ordinance No. 10 Series of 2026 sang Panitan para sa temporaryo kag partial nga paguba sang sa bahin sang Poblacion Ilaya-Cala-an National Road sa ginpatigayon nga Pagsanugpong Festival 2026; ginsuportahan man ang Roxas City Ordinance No. 057-2026 nga nagadeklara sang bahin sang public land bilang Roxas City Legacy Park, isa ka public memorial kag heritage space para sa pagpasidungog sa mga bantog nga Roxasnon kag pagbutang sang mga monumento, rebulto, bust kag commemorative markers.
Ginpabilin naman sang Sangguniang Panlalawigan ang iya posisyon sa Municipality of Tapaz Ordinance No. 26-08, Series of 2026, kag ginbalibaran ang request nga ideklara ini nga presumed consistent with law kag balido ukon i-recall ang SP Resolution No. 443, Series of 2026. Sa bahin sang Economic Affairs, Trade, Commerce and Industry Committee, ginsuportahan ang Municipal Resolution No. 26-076 sang Dumarao para sa 2027 Annual Investment Program (AIP) nga nagabalor P3.116 bilyon, pati ang Resolution No. 26-077 para sa 20-percent Development Fund nga P60.924 milyon, kag Resolution No. 26-078 para sa Supplemental AIP sang 2026 nga nagalakip sang P500,000 nga dugang nga pondo para sa pagbakal sang service vehicle. Ginsuportahan man ang resolusyon nga nagapadayon sa validity sang Mambusao Municipal Ordinance No. 07, Series of 2026, nga nagatukod sang solid waste management ordinance kag nagapatuman sang penalidad batok sa mga paglapas suno sa Republic Act No. 9003 ukon Ecological Solid Waste Management Act.
Sa katapusan, gin-updan sang mga miyembro sang konseho ang pagproseso kag pagrepaso sang nagkalain-lain nga proposed measures, communications, requests para sa supplemental appropriation ukon augmentation sang pondo, local legislative acts kag legislative acts sang iban nga probinsya, syudad, banwa kag mga ahensya. Lakip man sa agenda ang committee reports, impormasyon parte sa accomplishment report sang benchmarking activity, calendar of business, unfinished business, urgent matters kag mga iban pa nga wala pa ma-assign nga buluhaton antes ang second roll call kag pag-adjourn sang session.
