ROXAS CITY – Handa nga pamatud-an sang gobernador sa probinsiya sang Capiz nga wala sang korupsyon sa iya 45 ka tuig nga pagserbisyo bilang public servant sa mga Capizeño.
Sa exclusive interview sang Bombo Radyo Roxas kay Governor Antonio del Rosario, ginpahayag sini nga bukas ini sa lifestyle check sang National Bureau of Investigation (NBI) para ma-vindicate ini sa mga sala nga akusasyon sa iya.
Gindepensahan man sang gobernador ang ginpatindog nga resort sa Barangay Dayao, Roxas City sa diin kalakip sa ginkwestyon nga mga propedad sini magluwas sa ginaalegar pag-angkon sang madamo nga mga salakyan.
Gin-athag ni del Rosario nga ang duta nga ginatindugan sang ginpatindog nga resort ang ginpanubli pa sini sa iya mga ginikanan kag amat ang iya pagpatindog sa nasambit nga resort nga tobtob sa karon padayun ang pagdevelop.
Nagapanindugan ang opisyal nga tanan nga iya propedad ang gindeklarar sini sa iya nga SALN kag wala ini sang gintago.
Samtang aminado ini nga pagsalig ang rason sang iya pagkuha sa serbisyo sang mga utod kag anak para magtrabaho sa kapitolyo, apang suno diri nga co terminus lamang ang mga ini kag bisan ano oras mahimo nga mapahalin.
