ROXAS CITY – Isa isa nga ginsabat sang gobernador sang probinsiya sang Capiz ang kontrobersiyal nga mga isyu nga ginabato sa iya nga administrasyon humalin sa scholarship program kag operasyon sang dialysis center sa Roxas Memorial Provincial Hospital (RMPH).
Ginpahayag ni Governor Esteban Evan Nonoy Contreras nga may yara sang scholarship program ang iya nga administrasyon.
Apang posible nga indi maakomodar ang kapin sa 4,951 ka mga scholars sang nagligad nga administrasyon bangud sa kakulang sang pondo nga nabilin para sa amo nga programa.
Sa pagkamatood suno sa opisyal nga naghinyo na sila sang supplemental budget nga P3 milyones pesos sa Sangguniang Panlalawigan agud madugangan ang nabilin nga P2 milyones.
Ginasigahum sang gobernador ang sustainability sang program kag dapat may legal nga balasehan, guidelines kag kwalipikasyon ang mangin scholars kag indi lamang sila nakasulod bangud sa political accommodation
Ginakabig man sang opisyal nga financial assistance ang ginatawag sadto sang nagligad nga administrasyon nga scholarship program, bangud wala ini sang guidelines ukon balasehan.
Suno sa gobernador nga luyag sini tadlungon ang nasambit nga programa kag dapat magsunod sa kuwalipikasyon nga mga pigado, apang deserving nga mga estudyante ang mangin scholar sang gobyerno probinsiyal kag dapat mag-agi sa screening committee.
Ginapanindugan sini nga bilang gobernador sang probinsiya, obligasyon sini nga siguraduhon ang kaayuhan sang mga pumuluyo.
