Handa si Governor Esteban Evan Contreras II nga ihatag ang iya sweldo agud masabat ang kinahanglanon sang mga medical frontliners nga nagasakripisyo agud maserbisyuhan ang mga nagabalatian nga mga pasyente sa Roxas Memorial Provincial Hospital.
Ginhangkat man sini ang mga katapu sang Sangguniang Panlalawigan kun matood nga nagakabalaka ukon concern man sila sa mga medical frontliners, i-donar man nila ang ila sweldo.
Ginpahayag sang gobernador nga na-intiendihan kag nabatyagan sini ang sitwasyon sa karon sang mga frontliners nga kapoy na apang indi mahatag ang ila kinahanglan sa ospital kalakip sang mga pasyente.
Gani handa siya nga ihatag ang iya sweldo agud mabuligan bisan paano ang mga frontliners.
Samtang naghinyo si Governor Contreras sa mga board member nga aprubahan na ang supplemental budget sang RMPH.
Gingarantiya man sini nga pagasabton pananglitan may anomaliya nga mapamatud-an sa RMPH ang provincial board.
