Gina-usisa kag hugot nga ginabantayan sang gobyerno sang Pilipinas ang mga report may kaangtanan sa ginapatihan nga bag-o nga mga istruktura sa Bajo de Masinloc (Scarborough Shoal).
Suno kay Gilberto Teodoro Jr., padayon nga nagabag-o ukon “dynamic” ang sitwasyon sa rehiyon kag kinahanglan nga bantayan sang maayo.
Bisan gamay pa lamang ang mga aktibidad sa lugar, padayon ang pagmonitor sang gobyerno agud masiguro ang interes kag seguridad sang pungsod.
Madumduman nga halin pa sang 2012, yara na sa kontrol sang China ang shoal bisan pa sang desisyon sang 2016 nga ginpagwa sang Permanent Court of Arbitration nga nagbasura sa malapad nga “9-dash line” claim sang China.
Gindeklarar man sang korte ang shoal bilang isa ka tradisyunal nga pangisdaan nga dapat libre nga masudlan sang mga mangingisda.
Nahamtang ang shoal sa 124 nautical miles halin sa Zambales, kag klaro nga yara sa sulod sang 200-nautical mile Exclusive Economic Zone (EEZ) sang Pilipinas.
