Magabaligya ang gobyerno sang bugas sa balor nga P20 kada kilo sa mga lugar sa Visayas nga tuman nga naapektuhan sang 6.9 magnitude nga linog suno kay Agriculture Secretary Francisco Tiu Laurel Jr.
Suno sa tiglikom, ang ini nga programa magalawig sang indi magnubo sa isa ka bulan bilang gilayon nga bulig sa mga pamilya nga apektado sang linog nga nagtay-og sa syudad sang Bogo, Cebu sang nagligad nga Martes sang gab-i.
Dugang pa sini, iya man ginmando ang pagbaligya sang bugas sa balor nga P20 kada kilo sa iban pa nga lugar nga nahalitan sang linog, lakip ang Masbate kag Eastern Samar, agud makabulig sa pagpadasig sang recovery.
Samtang, ginpasalig naman sang Department of Agriculture nga handa man sila nga maghatag sang bulig sa mga apektado nga mangunguma, samtang ginahulat ang inisyal nga report angot sa kahalitan sa sektor sang agrikultura kag farm-to-market roads.
Nahibaluan nga ginpaidalom ang bug-os nga probinsya sang Cebu sa state of calamity sa diin masobra 69 ang narekord nga napatay kag ginatos ang napilasan.
Sa subong, padayon pa nga gina-verify sang National Disaster Risk Reduction and Management Council ang kabug-usan nga numero sang mga napatay kag napilasan.
