ROXAS CITY, CAPIZ- Ginpakigbahin sang isa ka abogado ang gahom kag importansya sang Free Patent sa pag-angkon sang titulo sang duta nga gina-akuparan sang mga kwalipikado nga mga indibidwal.
Sa interview sang Bombo Radyo kay Atty. Xy-ra Marie Albaña, nagikan sa Integrated Bar of the Philippines Capiz Chapter, iya ginpahayag nga ang free patent amo ang para sa mga wala pa narehistro nga agricultural lands kag residential land nga malayo ukon lain sa Certificate of Title ukon Emancipation Patent.
Suno kay Atty. Albaña, mahimo nga mag-apply ang mga naga-istar kag naga-trabaho pamaagi sang pagpasa sang mga dokumento kasubong sang Proof of Occupancy kag Tax Declaration. Limitado ang lapad sang duta nga mahimo nga makuha, depende sa layi.
Pahayag niya, ang programa, nag-umpisa pa sang pa sang 1900, sa diin tinutuyo sini nga mabuligan ang mga mangunguma kag lokal nga komunidad sa pagpalapad sang mga ulumhan, pagpasangkad sang agrikultura kag pag-secure sang ila nga duta.
Dugang pa sang natungdan, pila sa mga pagpanghangkat amo ang mahinay nga proseso kag kulang sa dokumento, apang nagapanilin ini nga importante nga instrumento para sa rural development.
Interviewed by Bombo Roadnie Daban Dalanon
