ROXAS CITY – Natigayon na nga mabaton sang mga alkalde sang 16 ka mga kabanwahanan kag syudad sang Roxas ang P100,000 nga tseke nga personal gindul-ong sang gobernador kaupod ang presidente sang League of the Municipalities of the Philippine (LMP) Capiz Chapter.
Ginpa-in ang nasambit nga tseke sa mga frontliners sa kabanwahanan agud ila magamit sa ila kinahanglanon sa pagpakigbato sa coronavirus disease ukon COVId-19.
Ginpahayag ni Governor Esteban Evan Contreras II isa ini ka pamaagi sang gobyerno probinsiyal agud ipakita ang pagpasalamat sa mga frontliners nga ginasakripisyo ang ila kabuhi agud lamang mahilway ang mga pumuluyo sa COVID-19.
Lauman pa suno sa gobernador ang tag P1-million nga financial assistance nga mabaton sang kabanwahanan kag syudad sang Roxas.
Ang nasambit nga kantidad suno kay Contreras ginpa-in para sa food assistance sang mga pumuluyo sa kabaranggayan kag kabanwahanan kag ginatugyan sini sa mga alkalde ang pagpamakal sang mga goods nga ipanagtag sa ila nasakupan.
Nahibaluan nga ginkuha ang nasambit nga pondo sa calamity fund sang probinsiya sang Capiz, agud mahatagan sang ayuda ang mga pumuluyo nga tuman naapektuhan sang COVID-19.
