ROXAS CITY – Nagpatigayon sang programa ang gobyerno-probinsiyal sa pagpanguna sang Provincial Tourism and Cultural Affairs Office (PTCAO) sa atubang sang Capiz Provincial Capital kadungan sang selebrasyon sang ika-121 ka tuig nga anibersaryo sang kahilwayan sang Pilipinas ukon Independence Day.
Ang nasambit nga selebrasyon ang may tema ‘Kalayaan 2019: Tapang ng Bayan, Malasakit sa Mamamayan’.
Ginsuguran ang nasambit nga programa sa tradisyunal nga flag-raising ceremony nga ginsundan sang pag-amba sang Capiz Hymn.
Kasunod sini nagpatigayon man sang wreath-laying ceremony kag naghatag sang mensahe ang isa ka historian nga si Dr. Vicente Villan, isa ka propesor sa University of the Philippines – Diliman.
May song performance naman si Mr. Leeby Langurayan kag ginsundan sang releasing sang 121 ka mga doves ukon salampati kag community signing.
Ang nasambit nga programa ang gin-updan sang mga empleyado sang Capiz Provincial Capitol, mga katapu sang Philippine National Police (PNP), Bureau of Fire Protection (BFP), Armed Forces of the Philippines (AFP), Boy Scouts and Girl Scouts of the Philippines kag mga opisyales gikan sa magkatuhay nga mga ahensiya sang gobyerno kag madamo nga iban pa.
