CAPIZ-Ginpangunahan sang Gobyerno Probinsyal sang Capiz sa idalom sang liderato ni Governor Fredenil H. Castro ang Provincial El Niño Action Planning Workshop agud mapalig-on ang preparasyon kag mga tikang sa pag-atubang sa epekto sang El Niño sa sektor sang agrikultura.
Ginpahigayon ang aktibidad sang Oktubre 27, 2026, sa PDRRMO Building sa ESLA, Barangay Lanot, Roxas City, nga gintambungan sang mga representante sang nagkalain-lain nga ahensya nga may kaangtanan sa agrikultura.
Sa nasambit nga workshop, ginpresentar ang kahimtangan sang mga kabanwahanan sa Capiz may kaangtanan sa epekto sang El Niño, lakip ang mga halit sa mga pananum kag ang epekto sini sa pangabuhian sang mga mangunguma.
Base sa pinakaulihi nga datos sang Disaster Risk Reduction and Management Information System ukon DRRMIS, naglab-ot na sa 8,311.06 ka ektarya sang talamnan sa probinsya ang apektado sang El Niño. Sa sini nga kabug-usan, 7,358.86 ka ektarya ang may bahin nga naguba, samtang 952.20 ka ektarya ang lubos nga naguba.
Ginpahayag man sa workshop ang nagkalain-lain nga teknolohiya, programa kag rekomendasyon agud mabuligan ang mga mangunguma sa pag-atubang sa malawig nga kakulang sang ulan kag iban pa nga posible nga epekto sang El Niño.
Nalakip sa mga naghatag sang impormasyon ang National Irrigation Administration, Bureau of Soils and Water Management, Philippine Rice Research Institute kag Philippine Crop Insurance Corporation, upod ang mga programa sang gobyerno para sa humay, mais, high-value crops, pagdumala sang peste, agricultural engineering kag kahayupan.
Paagi sa sini nga inisyatibo, ginapalig-on sang gobyerno probinsyal ang koordinasyon sang nagkalain-lain nga ahensya agud mapahagan-hagan ang posible nga pagnubo sang produksyon sa agrikultura, maprotektahan ang pangabuhian sang mga mangunguma kag masiguro ang padayon nga suplay sang pagkaon sa Capiz.
