ROXAS CITY – Naghatag ang federal government sang Estados Unidos sang temporaryo nga balay nga sarang maestaran sang mga naapektuhan sang nagluntad nga duha ka magkasunod nga linog sa Southern California sang damlag lang.
Ginpahayag ni Bombo International Correspondent Kenneth Dungca sang Barangay Dumolog, Roxas City kag anum ka tuig na nga nagatrabaho bilang executive housekeeper sa isa ka hotel sa Los Angeles California nga ini ang inisyal nga aksyon nga ginhimo sang gobyerno sa mga residente nga nagaestar sa Ridgecrest, Calfornia nga tuman nga nahalitan sang linog, bangud nabalaka ang gobyerno nga magbalik pa sila sa ila mga puluy-an.
Suno kay Dungca tuman nga nahalitan ang mga karsada sa Ridgecrest sa diin pila diri ang natunga rason nga temporaryo ini nga ginsarado sa mga umalagi.
Magluwas diri, may pila man ka mga insedente nga nasunog ang mga balay bangud sa nasambit nga kalamidad.
Sarado man ang pila ka mga stores kag hotels nga malapit sa epicenter sang linog, bangud madamo diri ang nagkalaguba.
Samtang ginpahayag ni Dungca ang pinakaulihi nga abiso sa ila sang gobyerno nga mangin handa sa posible mabaskog pa nga linog.
Gintuad ni Dungca nga sa iya pagtenir sa Amerika, ini pa lamang ang makabig sini pinakamabaskog nga linog nga iya naexperiensiyahan.
