ROXAS CITY – Naglab-ot sa masobra P200,000 ang natipon nga kantidad sang gobyerno sang syudad gikan sa mga violators nga wala nagatuman sa minimum health protocol sa COVID-19.
Nahibaluan nga mas ginhugot sang gobyerno ang pagpangdakup batuk sa mga salawayon nga indibidwal nga wala nagasuksok sa face mask kag face shield sa magkatuhay nga barangay kag merkado publiko agud malikawan ang paglapta sang COVID-19.
Ginpahayag ni Mrs. Lorelie Suelo, head sang crisis center nga humalin sang Enero tobtob sa karon nga bulan sang Abril, nakatipon ang gobyerno sang P215,000 gikan sa 1,721 ka mga violators nga nagbayad sang multa matapos madakpan nga nagalapas sa pagsulundan.
MAgluwas sa monetary penalty nga pagabayaran sang mga salawayon nga indibidwal, iban nga madakpan nga indi magbayad sang multa ang nagapatigayon na lamang sang community service.
