ROXAS CITY – Nagapabilin ang panindugan ang gobernador sang probinsiya nga wala nagapabor sa pagpanumbalik sang commercial flights sang eroplano kag barko sa pihak nga ginpaidalum na sa Modified General Community Quarantine (MGCQ) ang Capiz.
Ginpahayag ni Governor Esteban Evan Contreras II mas ginahatagan sang focus sa karon sang gobyerno sa una kag ikaduha nga semana ang pagpauli sang mga Locally Stranded Individuals (LSIs) kag OFW repatriates.
Suno sa opisyal nga ila nakasugtan sa ginpatigayon nga sinapol kaupod ang iban nga gobernador sa magkatuhay nga probinsiya sa Western Visayas nga ipaiway ang leisure trip agud indi gulpiada ang pagsulod sang mga tawo kag malikawan ang paglatpa sang COVID-19.
Apang kun ila mapahAnugutan ang commercial flights sa probinsiya siguraduhon nga mga residente sang Capiz ang sakay.
Ginklaro man sang opisyal nga kasunod sa pagpaidalum sa Capiz sa MGCQ wala na sang mangin problema sa pagpauli sang mga LSIs gikan sa magkatuhay nga lugar sa Rehiyon 6.
Ginkumpirma man ni Governor Contreras nga nagapakig-negosasyon ini sa karon sa isa ka indibidwal nga may koneksyon sa airline company, agud mapatigayon ang pagsakay sa eroplano kag pagpauli sang mga na-stranded nga mga indibidwal sang pila ka bulan sa Metro Manila.
Ginatun-an man nga antes makapauli ang mga stranded individuals sa probinsiya makapaidalum sila Real Time Polymerase Chain Reaction (RT-PCR) test agud masiguro nga hilway sa COVID-19.
Na-estorya man ni Governor Contreras ang pamunuan sang Civil Aviation Authority of the Philippines (CAAP) angut sa ginasiling scheduled flight sang mga commercial airlines.
Suno sa opisyal nga ginpasalig sa iya sang talatapan nga wala diri sang mangin problema bangud indi ma-forefeit ang ticket sang mga pasahero sa sulod sang isa ka tuig.
