ROXAS CITY – Ginakabig karon sang gobernador sang probinsiya nga isa ka daku nga opurtunidad nga makaupod kag maka-estorya sa personal si President Rodrigo Duterte sang yara sila sa Davao City.
Ginpahayag ni Governor Esteban Evan Contreras II nga natigayon ang ila nga pag-atubangay sang presidente pinaagi sa bulig ni Senator Christopher Bong Go.
Aminado ang opisyal nga nagpangayo ini sang bulig kay Duterte kasubong sa pila ka mga proyekto sa infrastraktura, bangud kun magsalig lamang sila sa lokal nga pondo, mabudlayan nga mahatagan katumanan ang ginahandum nga mga proyekto nga makabulig sa mga pumuluyo.
Suno kay Contreras nga wala ini nagtumod sang specific project nga patigayunon sa probinsiya sa bulig sang national government, apang isa sa mayor nga proyekto nga luyag mapatukod sa iya administrasyon ang daku nga ospital kag ang convention center sa diin mahimo mangin venue sang mga seminars, meetings kag iban pa.
Kumpyansa man ini nga sa masunod nga tuig 2020 masuguran na ang nasambit nga mga proyekto nga makabulig sa mga Capizeño.
Kasunod sini, ginkumpirma man sang gobernador ang pormal nga pagbukas sang Malasakit Center sa Roxas Memorial Provincial Hospital sa Nobyembre 6, 2019 nga isa sa mga highlight sa 50th Golden Thanksgiving celebration.
Ginpahayag ni Governor Contreras nga lauman ang presensiya ni Senator Bong Go nga magatambong sa nasambit nga kahiwatan.
Malipayon man nga gin-imporma sang gobernador ang publiko nga may inisyal nga P5milyones nga pondo para diri kag lauman ang bulanan nga pondo
Nahibaluan nga naghinyo ini nga kun mahimo i-dungan na lamang ang opening sang Malasakit Center sa iya nga kaadlawan sa bulan sang Nobyembre.
