ROXAS CITY – Isa isa nga ginsabat sang gobernador sang probinsiya ang pila ka mga kontrobersiya nga gindalahigan sang provincial administrator nga si Dr. Edwin Chinel Monares.
Sa exclusive interview sang Bombo Radyo, nangin bukas si Governor Esteban Evan Contreras II sa pagpamati sa opinyon sang iban nga mga tawo partikular ni Board Member Wildie Apolinario, nga yara sa likod sang nagguha nga open letter nga nagahinyo sa iya nga i-revoke ukon i-recall ang appointment ni Monares bilang provincial administrator sang probinsiya.
Suno sa gobernador nga ginarespeto sini ang opinyon sang tagsa ka tawo bangud tagsa tagsa ang entitled sang kaugalinagon nga opinyon.
Apang ginklaro ni Governor Contreras nga diretso sini kun sin-o ang iya saligan kag ipahamtang sa pwesto nga sa iya pagpati makabulig sa iya pagdumala sa probinsiya.
Sa isyu nga unprofessional si Monares kag wala sang tikang nga ginahimo agud mangin maayo ang relasyon sa tunga sang executive kag legislative department, ginklaro sang gobernador nga ginpanugyanan na sini si PA Monares nga kontrolon ang ginabuy-an nga tinaga kag mas maayo nga magtutuk na lamang sa trabaho, bangud mismo makita naman sang mga pumuluyo kun sin-o ang nagatrabaho kag sin-o ang wala sang ginahimo kundi magpamantay lamang sa hulag sang iban.
Apang indi man mabasol sang gobernador si PA Monares nga indi magsabat sa ginabato nga isyu sa iya, bangud kun kaisa below the belt kag personal na ang mga pag-atake nga ginahimo sang mga detractors sang administrasyon.
Aminado man ang opisyal nga bisan siya kun kaisa ang nagareact man sa mabatian nga kritisismo sang iya mga kasumpong sa pulitika nga kasubong indi pa mabaton nga wala na sila sa pwesto.
Apang ginapakalma lamang sini ang kaugalingon kag ginafocus ang atensyon sa pagtrabaho agud matuman ang ginpromesa sa mga pumuluyo nga makadala sang pagbag-o kag progreso sa probinsiya.
