ROXAS CITY – Indi pabor ang gobernador nga makabalik operasyon ang mga commercial flights sang eroplano kag barko sa probinsiya sa pihak nga mapaidalum na sa Modified General Community Quarantine (MGCQ) ang probinsiya sang Capiz sa masunod nga bulan sang Hunyo.
Ini ang nangin panindugan ni Governor Esteban Evan Contreras II sang mapakig-angutan sang Bombo Radyo sa katuyuan nga maprotektahan ang mga Capizeño batuk sa COVID-19.
Ginpahayag ni Governor Contreras nga indi sini luyag nga mangin gulpiada ang pagsulod sang mga tawo kasunod sang paghaluga na sang pila ka restrictions bangud sa pagpaidalum na sa Capiz sa MGCQ.
Ginpanindugan man sang gobernador nga indi siya pabor sa karon nga makasulod sa probinsiya ang mga bakasyunista apisar pa nga yara sa MGCQ ang Capiz kag mas ginahatagan prayoridad ang pagpauli sang stranded nga LSIs kag OFWs.
Ginklaro man sang opisyal nga wala na sang mangin problema sa pagpauli sang mga Locally Stranded Individuals (LSIs) gikan sa magkatuhay nga lugar sa Rehiyon 6, kun yara na sa MGCQ ang Capiz bangud mahimo na sila nga makadiretso pauli nga indi na kinahanglan magpaidalum sa rapid test ukon 14-day quarantine test sa quarantine facility.
Samtang nagpahanumdum si Governor Contreras sa mga LSIs kag repatriates OFWs sa guwa sang Region 6 nga magapauli nga kinahanglan nila nga magsunod sa protocol antes makapauli sa probinsiya.
