ROXAS CITY –Ginkumpirma ni Governor Esteban Evan Contreras II nga nakalab-ot na sa iya ang isyu angut sa pagbayluhanay sang komento ni Provincial Administrator Dr. Edwin Monares kag Board Member Eleuper ‘’Bulilit’’ Martinez sa social media sa diin naglab-ot pa sa paghangkatanay ang duha.
Suno sa gobernador nga ginpanugyanan na sini si PA Monares nga kontrolon sini ang mga tinaga nga iya ginabuy-an kag mas maayo nga magtutuk na lamang sa trabaho, bangud makita naman sang mga pumuluyo kun sin-o ang nagatrabaho kag sin-o ang wala sang ginahimo kundi magpamantay lamang sa hulag sang iban.
Apang ginpahayag ni Contreras nga ginpalab-ot sa iya ni Monares nga makabuhi man ini sang tinaga bangud kun kaisa tuman na ka personal ang ginahaboy sa iya nga hambalanon sang ila detractors kag bilang tawo, nasakitan man ini kag luyag mapangapinan ang kaugalingon.
Naghinyo man ang gobernador nga dapat mangin responsable man ang tagsa ka mga opisyal sa ila ginabuy-an nga tinaga kag kuntani mangin professional lamang.
Ginpanindugan pa ni Governor Contreras nga sa pihak sang ginadalahigan nga kontrobersiya ni Monares, nagapabilin ang trust and confidence sini sa provincial administrator.
