ROXAS CITY – Lauman ang istrikto nga pagpatuman sang border security kag quarantine protocols sa magasulod sa probinsiya sang Capiz, agud malikawan ang COVID-19.
Ginpahayag ni Governor Esteban Evan Contreras II nga mangin iksido ang mga kapulisan nga nagapatigayon sang checkpoint 24/7 sa entrance kag exit point sang probinsiya agud masiguro nga hilway sa COVID-19 ang nagasulod kag indi mabutang sa peligro ang kabuhi sang mga Capizeño.
Suno sa opisyal nga kinahanglan man nga magpakita sang health clearance ukon health declaration ang magasulod sa probinsiya bilang pamatood nga nagatrabaho ini sa syudad.
Magluwas diri, kinahanglan man ng magpaidalum sa quarantine protocols sa diin pagatsekyaron kun may yara ini sang lagnat ukon flu like symptoms.
May ginhimo naman nga tikang ang probinsiya angut sa 772 ka mga pasahero sang isa ka barko nga nag-abot kahapon sa Culasi Port.
Ginpahayag ni Contreras nga napagkit sa Executive Order No.10 nga kinahanglan magpaidalum sa quarantine procedure ang mga pasahero nga gikan sa Metro Manila, bilang kabahin sang ginasunod nga protocol agud malikawan ang paglapta sang COVID-19.
Daku man ang mabulig sang mga opisyales sa barangay agud ma-monitor ang mga indibidwal nga nag-alabutan sa ila lugar nga gikan sa Manila.
Kinahanglan nga sa kasubong nga sitwasyon, otomatiko nga magself quarantine ang mga bag-o abot, bilang pagsunod sa pagsulundan kag agud indi makahalit sa iban nga tawo.
