ROXAS CITY – Boluntaryo nga nagself-quarantine si Governor Esteban Evan Contreras II makaligad nga nagpadulong ini sa Metro Manila kag nakapauli diri sa probinsiya sang Capiz sang Miyerkules, Marso 11.
Ginapangabay man niya ang mga opisyales sa probinsya nga iya nakaupod sa Metro Manila nga magpaidalum sa self-quarantine.
Aminado ang gobernador nga sa pihak nga wala man siya nakabatyag sang mga sintomas sang COVID-19, ang iya pagpaidalum sa self-quarantine ang bilang preventive measure batuk sa nasambitan nga balatian.
Ginpahayag pa sang gobernador nga wala man ini sang nakita nga malain kun magself quarantine ang isa ka indibidwal nga gikan sa Metro Manila, bangud katuyuan sini nga masiguro nga matapna ang paglapta sang Coronavirus ukon COVID-19.
Naghinyo man ini sang kooperasyon sang mga opisyales sa barangay nga mangin alerto sa mga nagaalabutan sa ila barangay nga gikan sa Manila bangud wala mahibaluan kun nakaangkon sila sang close contact sa pila ka mga Person Under Investigation (PUI).
Naghinyo man ini sang pag-intiende sa pila ka mga okasyon nga nauna sini ginpasaligan nga pagakadtuan nga ipaiway lamang niya ini sa karon bangud kinahanglan sini magself quarantine.
Apang sa pila ka importante nga mga sinapol nga kinahanglan ang presensiya sang gobernador, ginpahayag sini nga iya ini paga-atindiran, apang magagamit lamang sang face mask bilang preventive measure.
Samtang nagapati ang gobernador nga bisan paano mabuhi ang mga Capizeño, bangud kumpleto halos ang probinsiya sa tanan nga mga produkto humalin sa bugas kag isda nga ila kinahanglanon.
