ROXAS CITY – Nagtukod sang isa ka fact finding committee ang gobernador sang probinsya sang Capiz angut sa kamatayon sang apat ka mga pasyente sa Intensive Care Unit sang Roxas Memorial Provincial Hospital sang naglaslas ang Bagyo Ursula sang nagligad nga bulan sang Disyembre.
Sandig sa ginpaguha nga memorandum ni Capiz Governor Esteban Evan Contreras II, pagabug-usan ang nasambit nga komite sang pinuno sang provincial health office bilang chairman, provincial legal office, provincial general services office, chairman sang committee on Health sa Sangguniang Panlalawigan kag pinuno sang provincial engineering office bilang miyembro.
Kabahin sang trabaho sang fact finding committee amo ang pagpatigayon sang inquiry sa mga sirkumstansya nga gintunaan sang kamatayon sang apat ka mga pasyente kalakip ang pagsekyar sang standard operating procedure ukon protocol sang RMPH pag abot sa mga emergency situations,kag pagpreparar sang nakaigo nga rekomendasyon para ma-imprubar ang serbisyo sang ospital.
Ginhatagan sang 15 ka adlaw ang miyembro sang fact finding committee para makahatag sang resulta sang imbestigasyon.
