ROXAS CITY – Pagatinguhaan sang gobyerno probinsiyal nga mahatagan sang bulig ang tanan nga mga scholars.
Ini ang nangin pahayag ni Governor Esteban Evan Contreras sa exclusive interview sang Bombo Radyo, kasunod sang pagpakigkita sa iya sang mga Aksyon-Agad scholars sa idalum sang del Rosario administrasyon sa iya nga talatapan.
Ginpahayag sang gobernador nga ginahimud-usan sa karon sang iya administrasyon nga mabuligan kag mapaigo igo ang pondo nga ginpa-in para sa scholarship program.
Apang suno kay Contreras nga indi maglaum ang mga estudyante nga nagabutho sa pribado nga eskwelahan nga P10,000 ang ila mabaton, bangud sa hinali nga pagtaas sang numero sang mga scholars, paigu iguon lamang ang pondo agud tanan ang maka-ambit.
Sa karon suno kay Governor Contreras nga ginpa-validate na sini ang pangalan sang mga scholars agud matumod ang ila mga eskwelahan.
Nagmandu naman ang opisyal nga matapos ang validation, gilayon suguran ang pagproseso sang budget agud gilayon nga ma-release.
