Nagsaka sang 3.07% ang kabilugan nga kita sang gobyerno umpisa Enero tubtob Agosto subong nga tuig, suno sa Bureau of the Treasury (BTr), nga naglab-ot sa P3.09 trilyon kun ipaanggid sa P2.99 trilyon sang tinalikdan nga tuig.
Nagpanguna ang Bureau of Internal Revenue (BIR) sa koleksyon sang buwis, nga nakakolekta sang P2.14 trilyon sa diin nagsaka sang 11.44% bangud sa mas mataas nga koleksiyon halin sa corporate kag personal income taxes, value added tax (VAT), kag iban pa.
Nakabulig man ang Bureau of Customs (BOC) nga nakakolekta sang P621.4 bilyon, mas mataas kun ipaanggid sa tinalikdan nga tuig.
Samtang, naglab-ot sa P298.3 bilyon ang non-tax revenues, kun sa diin P189.3 bilyon ang halin sa kita sang Bureau of the Treasrury, nga naglapaw sa target bangud sa mataas nga interest earnings kag dividends halin sa mga ahensya kasubong sang Philippine Amusement and Gaming Corporation (PAGCOR) kag Manila International Airport Authority (MIAA).
Nagsaka man ang budget deficit sang pungsod sa P84.8 bilyon sang Agosto bangud sa mas madasig nga pagnubo sang kita kaysa sa paggastos.
Umpisa Enero tubtob Agosto, naglab-ot na ang deficit sa P869.2 bilyon, mas mataas sang halos 25% kun ipaanggid sa kapareho nga panahon sang 2024.
