ROXAS CITY – Nagkalain-lain nga ahensya sang gobyerno nagtingub pwersa pinaagi sang isa ka aktibidad sang Integrated Sustainable Assistance Recovery and Advancement Program (ISARAP) agud maghatag sang assistance, serbisyo kag benepisyo sa mga pumuluyo nga naapektuhan sang mga kalamidad.
Ini ang ginpahayag ni Atty. Janilo Rubiato, ISARAP Western Visayas Led Convenor sang ma-interview sang Bombo Radyo.
Suno kay Rubiato, nga magapadulong sa probinsya sang Capiz ang ISARAP agud maghiwat sang mga aktibidad para sa mga pumuluyo kag ini ang pagahiwaton sa Covered Gym sang banwa sang Dao sa Biyernes nga adlaw, Abril 29 alas 9 ang takna sa aga.
Dugang pa ni Rubiato, nga makabenepisyo diri ang tanan nga pumuluyo sang probinsya sang Capiz nga ma-identify sang nagkalain-lain nga ahensya sang gobyerno nga sarang kag nagakaangay nga mahatagan sang bulig.
Ginpatpat man sini ang mga ahensya nga magapadulong sa nasambit nga lugar agud maghatag sang serbisyo kag benepisyo. Ini ang mga masunod:
Department of Social Welfare and Development (DSWD), Department of Labor and Employment (DOLE), Land Transportation Franchising and Regulatory Board (LTFRB), Land Transportation Office (LTO), Department of Health (DOH), Department of Education (DepED), The Bureau of Fisheries and Aquatic Resources (BFAR), Philippine Coconut Authority (PCA), Department of Trade and Industry (DTI), Department of Information and Communications (DICT),
Department of Environment and Natural Resources (DENR)
MHA, PhilHealth, TESDA kag madamo sang iban pa.
Ginpahayag man sini nga ini na ang ikaduwa nga round nga nagpatigayon ang mga nasambit nga ahensya sang aktibidad pinaagi sa ISARAP agud magdul-ong sang nagkalain-lain nga serbisyo.
Gintuad man sini nga nakahiwat na sila sang aktibidad sa Negros Occidental sadtong Abril 8, sa probinsya sang Iloilo sadtong Abril 9 kag nagtabok sila sa banwa sang Kalibo sa probinsya sang Aklan sadtong Abril 10.
Bangud sa sini nga aktibidad, ginkalipay ini ni President Rodrigo Duterte gani igapadayon pa ini sa pila ka mga rehiyon sa pungsod.
Gin-athag man sini nga tuyo nila ini nga pagahiwaton kuntani sa syudad sang Roxas apang suno diri nga wala sang available nga venue nga maka-akomodar sang madamo nga numero sang pumuluyo nga magatambong sa sini nga aktibidad. Gina-imbitar man sini ang tanan nga pumuluyo sang probinsya nga magpadulong sa banwa sang Dao agud maka-avail sang serbisyo kag benepisyo nga ginatan-ay ang nagkalain-lain nga ahensya sang gobyerno bangud ini ang kabahin sang mando ni President Duterte nga ihatag sa pumuluyo ang dapat para sa pumuluyo.
