ROXAS CITY – Bukas nga gin-abi-abi ni Governor Fredenil “Oto” Castro ang tanan nga nagtambong sa 2022 Brigada Eskwela Regional Kick-off Program sang Department of Education (DepEd) nga ginhiwat sa Capiz Gymnasium, Villareal Stadium sining syudad ilabi na ang mga opisyales sang DepEd Regional Office.
Suno sa nangin mensahe sang gobernador, bangud sa pagpalangga wala niya ginakabig nga dumuluong ang mga bisita kundi ginakabig niya ini nga isa sa mga pumuluyo sang syudad sang Roxas kag probinsya sang Capiz.
Masadya man siya suno diri sa ginpatigayon nga Brigada Eskwela 2022 bangud kasadyahan niya nga makita ang mga estudyante nga masadya man nga magbalik sa tradisyunal nga pag-eskwela, apang ara sa gihapon ang iya pag duha-duha bangud sa nagapabilin nga Covid-19.
Apisar wala ang presensya sang Secretary of Education nga si Vice President Sarah Duterte, ginsiling ni Gov. Castro nga mabatyagan ini sa gihapon bangud sa tampad sini nga pagsuporta padulong sa progreso sang sistema sa sektor sang edukasyon sa pungsod.
Gindayaw man sini ang nangin presentasyon sang mga manunudlo kag staff nga nagpasundayag sang ila mga talento nga gikan pa sa nagkasari-sari nga eskwelahan sa probinsya kag ginpabugal ang Western Vizayas nga no. 1 sa patag sang edukasyon sa bug-os nga pungsod Pilipinas.
