Pormal na nga gin-aprobahan ni Capiz Governor Fredenil H. Castro ang appointment ni Police Colonel David L. Cachumbo Jr. bilang bag-o nga Provincial Director sang Capiz Police Provincial Office ukon CPPO.
Nakigkita si Col. Cachumbo kay Governor Castro sa talatapan sini subong nga Agosto 18, 2026, bilang kabahin sang iya pag-angkon sang bag-o nga responsibilidad sa pagmintinar sang kalinong, katawhay kag seguridad sa probinsya.
Gindala ni Cachumbo ang iya appointment letter para sa pormal nga pag-apruba kag rekomendasyon sang gobernador.
Ginpahayag naman ni Castro ang iya bug-os nga suporta kag pagsalig sa bag-o nga hepe sang CPPO, ilabi na sa pagpatuman sang mga programa para sa kaayuhan sang mga Capiznon.
Ginpahayag man ni Cachumbo ang Project CAPeace–Tawhayan, isa ka programa sang CPPO nga magapatukod sang “Balik-Loob” kag Surrender of Loose Firearms Assistance Desk.
Tuyo sini nga mapalig-on ang peace-building kag reintegration efforts para sa mga anay rebelde nga nagpili nga magbalik sa sabak sang gobyerno.
Talakayon man ang padayon nga kampanya sang kapulisan batok sa ilegal nga droga, nga ginakabig nga isa sa mga problema nga nagadala sang halit sa mga pamilya kag nagapugong sa maayo nga palaabuton sang komunidad.
Nag-upod kay Col. Cachumbo sa pagbisita sanday Police Lieutenant Colonel Pedro Goldino Diocson, Chief sang Police Community Affairs and Development Unit; Police Captain Maria Fe Tupaz Umiten, OIC-Chief of Police sang Pontevedra Municipal Police Station; kag PPOC Focal Person Primo Golingay.
