ROXAS CITY – Handa ang gobernador sang probinsiya sang Capiz nga makig-atubang para sa isa ka hinun-anon sa mga miyembro sang Sangguniang Panlalawigan agud ma-estoryahan ang problema sa tunga sang executive kag legislative branch.
Ginpahayag ni Governor Esteban Evan Contreras II nga bukas ini sa posibilidad nga ila mapungkuan kag ma-estoryahan sang mga board members ang pila ka mga isyu agud makaangkon sang harmonious relationship ang duha ka sangay sang gobyerno.
Gintadlong man sang amay sang probinsiya ang nangin statement sang pila ka mga board members nga pending pa sa Office of the Governor ang ila request nga pondo.
Suno kay Governor Contreras may yara na ini nga napirmahan nga request of funds sang pila ka mga board members nga magahalin sa pondo sang ehekutibo.
Kun may iban man nga voucher ukon tseke sang mga board members nga wala napirmahan, posible nga wala pa ini nakalab-ot sa talatapan sang gobernador.
Aminado sang opisyal nga luyag sini makita ang sinseridad sang mga board members nga nagapalapit sa iya, bangud mangin wala pulos man sa gihapon ang tanan kun matapos ang ila nga paghinun-anon kag libakon ukon pakalainon ini.
Ginapanindugan pa sang gobernador nga indi maayo nga may konflikto ang ehekutibo kag lehislatibo bangud dapat may kooperasyon ang magtimbang nga bahin agud ila ma-deliver ang maayo nga serbisyo sa mga pumuluyo.
Nagpangabay man ini sa natungdan nga mga board members nga indi pag-ipiton ang pila ka mga request nga gikan sa talatapan sang gobernador bangud para sa mga Capizeño ang mga proyekto nga ginadihon sang gobyerno.
