ROXAS CITY-Bukas sa posibilidad ang gobernador sang probinsiya nga mag-reconvene ang Provincial Development Council (PDC) santu man sa rekomendasyon sang Sangguniang Panlalawigan agud matalakay ang nakita nga iregularidad sang mga board members.
Ginpahayag ni Governor Esteban Evan Contreras II nga handa ini nga liwat magpatawag sang PDC meeting agud ma-estoryahan ang ginaalegar sang mga board members nga discrepancy nga ila nakita sa implementasyon sang mga proyekto.
Nagalaum man ang amay sang probinsiya nga pinaagi sini matigayon na nga mapapasar ang Annual Investment Plan 2020 sang probinsiya bangud madamo ang maapektuhan kun ma-delay pa ini.
Kalakip diri ang implementasyon sang mga proyekto nga ginahinyo sang mga pumuluyo sa barangay kag ang salary increase sang mga empleyado sang kapitolyo probinsiyal.
Nauna diri, ginpahayag ni Contreras nga nagtinguha na ini nga magreach out sa mga board members sang nag-abot sa probinsiya gikan sa iya pagbakasyon matapos ang bagyo Ursula.
Apang natabuan nga masako ang mga board members.
Samtang yara na karon sa rebuilding stage ang ginahatag nga assistance sang gobyerno probinsiyal sa mga naapektuhan sang bagyo Ursula.
Naghatag na sang instruksyon si Governor Contreras nga magpangita sang mabaklan sang G.I sheet.
Magluwas sini padayon ang ila pagtinguha nga mahatagan sang assistance ukon pagkaon ang apektado nga mga pumuluyo.
