ROXAS CITY – Plano nga estoryahon sang gobernador sang probinsiya ang mga alkalde sa kabanwahanan angut sa P5 milyones pesos nga pondo nga ginahinyo sang League of the Municipalities (LMP) Capiz chapter sa gobyerno probinsiyal.
Ginpasiguro ni Governor Esteban Evan Contreras nga may ginpartenisir ini nga proyekto tagsa ka banwa kag barangay bangud ini ang iya ginpromesa sa mga pumuluyo nga dalhon palapit sa mga Capizeño ang gobyerno.
Suno sa gobernador nga luyag sini nga mabatyagan sang mga pumuluyo ang bulig kag pagsuporta sang gobyerno.
Ginpahayag pa sang opisyal nga gamay lamang ang P5 milyones nga pondo nga ginahinyo sang LMP Capiz chapter apang kinahanglan pa ini nga tun-an sang gobyerno agud masiguro nga makabenepisyo diri ang mga pumuluyo.
Nagapati ini kun mag-asenso ang barangay, maga-asenso man ang banwa kag kalakip man diri ang probinsiya.
Ginpahayag pa ni Contreras nga indi kinahanglan nga estoryahan ang pulitika sa iya pagpadulong sa mga kabaranggayan kag kabanwahanan, bangud importante nga mapalab-ot sini ang mga proyekto sa natungdan nga komunidad.
Mas maayo suno sa gobernador nga magfocus sila sa pagserbisyo sa mga Capizeño kag kun ano pa ang mahatag nga kaayuhan sang gobyerno sa mga pumuluyo.
