ROXAS CITY – Ginpasalig ni Governor Esteban Evan Contreras II nga magahatag sang legal support ang gobyerno probinsiyal sa kapin 263 ka mga biktima sang illegal recruiter.
Suno sa gobernador nga matapos ang pagsapol sa mga nabiktima ni Ramilyn Andrade, nagpaguwa ini sang direktiba sa provincial legal office nga asisteran ang pribado nga mga abogado nga ginkuha sang gobyerno probinsiyal para magserbisyo sa mga biktima.
Ginkumpirmar sang opisyal nga magluwas kay Atty. Atlas Catalan, magakuha sang isa pa ka pribado nga abogado ang gobyerno.
Ginpangabay man sini sa mga biktima nga magpa-photo copy sang ila resibo kag iban pa nga mga papeles agud magamit nga ebedensiya sa ipasaka nga panumbungon batuk kay Andrade.
Ginpahanumdum man sang gobernador ang publiko labi na ang nagapangita sang trabaho nga siguraduhon nga legal kag indi illegal recruiter ang ila nga masalapuan.
Ginpalab-ot man ni Gov. Contreras nga agud masiguro nga indi mabiktima sang illegal recruiter tsekyaron ang mga job vacancies online pinaagi sa Capiz Kabalaka Job Portal.
