ROXAS CITY – Nagpanugyan karon si Governor Esteban Evan Contreras II sa mga na-stranded nga indibidwal sa Metro Manila kag iban nga lugar nga luyag magpauli sa probinsiya sang Capiz nga makig-angut lamang sa facebook page sang Kabalaka Information Center.
Suno sa gobernador nga ginatinguhaan sini nga mahitso ang ila negosasyon sa pila ka indibidwal nga konektado sa airline company agud masuguran na ang pagpauli sa mga stranded individuals.
Kalakip sa mga impormasyon nga ipalab-ot sang stranded individuals nga magapauli sa Capiz sa Kabalaka Information Center amo ang ila kumpleto nga pangalan, edad, address, point of origin ukon ang ila ginhalinan, ang point of destination ukon ang ila padulungan sa probinsiya kag contact number.
Nagpasalig man si Governor Contreras nga ginahimud-usan sini nga mabuligan ang tanan nga mga na-stranded nga makapauli apang kinahanglan nila ang kooperasyon.
Samtang plano sa karon sang gobernador nga magtukod sang testing facility sa Capiz agud mangin madasig ang pagproseso kag madali mahibaluan ang resulta sang ginpatigayon nga test sa mga suspected COVID-19 patients.
