ROXAS CITY – Ginpasiguro sang gobernador sang Capiz nga wala nila ginatolerar nga pamilya Contreras ang sala nga buluhaton sang bisan sin-o nga miyembro sang ila pamilya.
Ini ang matigdas nga ginpahayag ni Governor Esteban Evan “Nonoy” Contreras, sang mainterview sang Bombo Radyo.
Suno sa gobernador, paglupok sang isyu nga ginaalegar ginhimuslan sang iya hinablos nga si EJ Contreras ang wala ginhingadlan nga lady rider/looper nga taga Metro Manila, yara ini sa bahin sang airport kag magapauli diri sa probinsya sang Capiz nagikan sa Malacañang.
Nakibot ini sa ginbalita sa iya kag gilayon nga ginkumpirmar sa iya hinablos kun ano ini kamatuod nga alegasyon.
Sa ila malip-ot nga pag-istoryahanay ni EJ, ginsiling sang iya hinablos nga ‘friend’ niya ang lady rider, kun sa diin nahubog ang babayi sa ila Headquarters, rason nga ginpatawgan suno diri ni EJ ang barkada sang babayi nga sugaton na ini, apang nagpadulong sa isa ka beach resort ang biktima, kaupod ang iya mga abyan.
Ginpanindugan man sang iya hinablos nga wala sang may natabo nga pagpanghimulos bangud wala na ini makaupod sa amu nga resort.
Apang, kun mapamatud-an nga nagpanghimulos ang iya hinablos, ginpasiguro sang isa ka tiyo kag gobernador sang probinsya nga siya mismo ang mapapreso diri, bangud ang kaangay sini nga buluhaton ang wala ginatolerar sa ila pamilya.
Suno pa kay Contreras nga sa kadugayon sang ila pamilya sa pulitika, bisan pa ang iya amay ang anay gobernador, wala ini nag-intra ukon na-involve sa kaangay nga isyu bangud importante sa ila ang ila reputasyon.
Nagapati man ang gobernador nga pagasakyan ini nga hitabo sang mga kontra sini sa pulitika, gani nakahanda man ini sa igabato pa nga isyu sa ila pamilya.
Sa katapusan, ginpahayag ni Contreras nga wala sang may matabo nga dampiganay sa tunga sang otoridad kag sa ila nga pamilya bangud magapangibabaw ang kamatuoran.
Nahibaluan nga napasaka na ang kaso nga Rape batuk kay EJ Contreras pinaagi sa regular filing.
Nagakahulugan nga hilway sa karon ang ginatudlo suspek kag magahulat nalang ini sang igapapanaug nga warrant of arrest depende sa mangin desisyon sang korte sa amu nga panumbungon.
