ROXAS CITY – Personal nga gindala sang gobernador sang probinsiya sang Capiz ang kinahanglanon nga bulig sang isa ka iloy nga nagbun-ag sang triplets sa Mamabusao District Hospital sang damlag lang.
Tuman ang pagpasalamat sang iloy nga si Genevieve Fundal matapos nga mismo si Capiz Governor Esteban Evan Contreras II pa ang nagdala sang kinahanglanon nga bulig sang tatlo ka mga baby girls nga sanday Maryjane, MaryJoy kag MaryJay Fundal.
Kalakip sa bulig nga ginhatag sa triplets amo ang bulong, dugo kag incubator.
Magluwas diri naghatag man sang financial support ang gobernador kalakip si Mayor Leodegario Jun Labao Jr., sang Mambusao nga naghatag man sang cash assistance sa pamilya Fundal.
Nauna diri nagpangayo sang bulig ang pamilya Fundal sa sin-o man nga makahatag sang ayuda agud ila magamit sa kagastuhanan sa ospital sang mag-iloy.
Nahibaluan nga nagbun-ag si Genevieve Fundal sang triplets nga lunsay mga babaye samtang yara sa idalum sang general community quarantine ang probinsiya sang Capiz bangud sa COVID-19 pandemic.
