Wala sang otoridad ang gobernador nga makapasaka ukon makapanubo sa klasipikasyon sang isa ka lugar, kundi ang National Inter Agency Task Force lamang.
Ini ang nangin pagpaathag ni Capiz Governor Esteban Evan Contreras II kasunod sang ginahinyo nga mapasaka sa General Community Quarantine (GCQ) ang Capiz, kasunod sang maka-alarma nga pagtaas sang COVID-19 cases sa probinsiya.
Suno kay Governor Contreras nga na-intiendihan sini ang concern sang pribado nga mga ospital, apang indi madali ang proseso kag kinahanglan nga ipalab-ot sa natungdan nga ahensiya sang gobyerno.
Ginpahayag sang opisyal ang sarang lamang mahimo sini bilang amay sang probinsiya ang pagrekomendar sa Regional IATF, apang ang naga-aprubar amo ang National IATF.
Nahibaluan nga may yara sang parameters nga ginatan-aw ang DOH kag Inter Agency Task Force antes aprubahan ang nasambit nga request.
Ba-se sa IATF resolution, antes maaprubahan ang request kinahanglan ma-deklara sang alkalde nga 25% sang barangay nga nasakupan ang ginpaidalum sa lock down
Amo man sa probinsiya, dapat 25% sang kabanwahanan ang na-lock down na.
Pag-abot naman sa bed capacity para sa mga COVID-19 patients, ginpahayag ni Governor Contreras nga ba-se sa mandatu sang DOH, dapat may 20% bed capacity nga gin-alokar ang pribado nga ospital para sa mga COVID-19 patients.
Sa bahin sang RMPH masobra sa gina-require nga bed capacity sang DOH ang gintigana sang amo nga ospital sa diin bisan mild COVID-19 patients nga ginapadala sang kabanwahanan ang gindala na sa Capiz Gym.
Sa pihak nga yara sa MGCQ ang probinsiya, apang iban nga mga health protocols nga ginapatuman sa mga lugar nga ginapaidalum sa GCQ ang gina-implementar sa karon.
