Governor Esteban Evan Contreras II pabor nga indi na pagpangitaan sang RT-PCR test ang magapasulod sa probinsiya, apang nabalaka nga maggamit sang peke nga vaccination card ang mga travelers

Magapabilin sa status quo ukon pagsunod sa pagsulundan nga kinahanglan ang RT-PCR testing sang magasulod nga mga travelers sa probinsiya sang Capiz nga wala sang mapakita nga pamatood nga nakatapos na ini sa 2^nd dose sang pagpabakuna sa COVID-19 vaccine.

Ginpahayag ni Governor Esteban Evan Contreras II nga pabor man ini kuntani nga indi na pagpangitaon ang RT-PCR result sa baylo ipakita na lamang ang vaccination card bilang pamatood nga nakatapos na pabakuna sang 1^st kag 2^nd dose ang travelers.

Apang ang ginakabalak-an lamang sang amay sang probinsiya kun paano masiguro nga indi peke ang ginapakita nga vaccination card, bangud may mga kaso na nga ginapeke ang RT-PCR result.

Bangud ginpakamaayo sang gobernador nga magahimo sang vaccination card nga may QR code para sa mga Capizeño nga nakatapos na sang duha ka dose sang bakuna nga ila sarang ma-presentar kun magguha kag magbalik sila sa probinsiya.

Apang sa iban nga wala sang mapakita nga vaccination card magasunod sa standard protocol nga kinahanglan magpakita sang negative result sang RT-PCR test.

Pag-abot naman sa alokasyon sang COVID-19 vaccine nga naga-abot sa probinsiya, ginpahayag sang gobernador nga maswerte ang Capiz bangud padayon ang pagbaton sang probinsiya sang mgabakuna nga ginapadala sang gobyerno nasyunal.

Nahibaluan nga may palaabuton nga 741mil ka doses sang AstraZeneca, Johnson and Johnson kag Sinovac vaccine ang Western Visayas, kag pinakadaku ini nga alokasyon nga mabaton sang mga probinsiya sa rehiyon 6 sa masunod nga mga inadlaw.