ROXAS CITY – Patay ang isa ka solterito matapos ginbuntog sang mismo hinuptan sini nga cobra sa Barangay Bago, Roxas City.
Ang biktima ang ginkilala nga si alyas Ryan, 16 anyos kag isa ka Grade 10 student.
Sa exclusive interview sang Bombo Radyo kay Manang Grace, iloy sang biktima, ginpahayag sini nga nakibot na lamang siya sang nakit-an nga nagapalanggit-om na ang anak sini sa iya higdaan sa ila sala.
Sang iya ginpalapitan, ginapahayag nga malamig na ang lawas sini.
Gintinguhaan pa nga madala sa ospital ang biktima apang gindeklarar ini nga dead on arrival.
Nahibaluan na lamang sang pamilya nga ginbuntog sang iya hinuptan nga man-og ang biktima sang makit-an sa iya cellphone ang pila ka laragway sang iya pilas kag mismo nawong sini nga indi na halos makamuklat ang iya mata.
Sang ila gin-tsekyar, nakit-an nila ang apat ka mga pilas ukon marka sang pagbuntog sang man-og sa kamot sang biktima.
Sa kaakig sang ginang, ginhatuk-hatok sini sang labu ang hinuptan nga man-og sang anak samtang nagasinggitan kag nagahilibion.
Suno pa sa ginang nga bata pa lamang si Ryan, nakitaan na ini sang pagkahuyog sa paghupot sang tumalagsahon nga mga sapat bangud magluwas sa man-og, may hinuptan man ini nga mga isda, alligator gar, lizard ukon tuko, tarantula ukon damang kag iban pa.
