ROXAS CITY – Gin-pataas ang grade requirement sa mga naga-tuyo magpa-enrol sa Capiz State University(CAPSU).
Ini ang gin pahayag ni Dr. Adelfo Z. Virtudazo, Campus Administrator sang CapSU-Mambusao sang mainterview sang Bombo Radyo.
Suno diri gin-patuman ang amo nga sistema bangud natukiban nga mataas ang nakukuha nga grades sang mga estudyante subong nga modular learning sa diin sa bag-o nga pagsulundan kinahanglan sang mga nagapa-enroll sang Grade Point Average(GPA) nga 88% para sa mga may board exam nga kurso kag 85% naman sa mga wala sang board exam nga kurso.
Dugang pa ni Virtudazo nga wala man dapat sang below 80 nga grade ang isa ka senior high student nga maga pa-enrol, apang iga-cater sa gihapon sang unibersidad ang mga may manubo sa required average bilang mga ‘reserve’ kag iga-administer sa tion nga madamo pa sang slots ang bakante.
Sa pihak nga bahin, magapatuman sang first come first serve basis ang buluthuan bangud sa limitado nga slots para sa ila degree programs sa diin gina-limitahan sa menus 100 ang mga enrollees sa identified ‘limit courses’ sang CHED kag masobra 300 enrollees naman ang sa mga identified ‘priority courses’ sang ahensya nga may tinutuyo nga mapataas ang employment rate sang graduates.
Samtang, padayon ang pagpreparar sang buluthuan para sa limited face to face classes nga posible matabo sa masunod nga school year nagapalab-ot naman ini nga padayon ang admission application para sa incoming students sang unibersidad.
